Leiðsögn um sýningar

Spjall um sýningar safnsins og hugmyndirnar á bak við þær. Einnig er hægt að óska eftir að fá kynningu á starfsemi safnsins.

Í heimsókn á Ljósmyndasafn Reykjavíkur fá nemendur innsýn í þær hugmyndir sem sýning safnsins hverju sinni byggir á. Safnið setur upp fjölbreyttar sýninga ár hvert með það að markmið að kynna íslenska ljósmyndara og koma á framfæri, sýna verk úr safneign sem og að sýna verk erlendra ljósmyndara.

Kennarar geta valið að hefja heimsóknina á stuttri kynningu á starfsemi safnsins áður en hópurinn skoðar yfirstandandi sýningar. Nemendur kynnast þá ólíkum verkefnum safnsins og varðveislu ljósmynda með því að skoða „kontakt“ möppur, bóka- og tímaritakost safnsins.

Hafi kennarar séróskir varðandi heimsóknir á safnið hvetjum við þá til að hafa samband við fræðsluteymi Borgarsögusafns safnfraedsla@reykjavik.is. 

Núverandi sýning í aðalsal:

6. mars - 19. september 2021

Hið þögla en göfuga mál

Yfirlitssýning um ljósmyndaferil Sigurhans Vignir

Vignir starfaði lengst af sem ljósmyndari í Reykjavík og á sýningunni eru myndir frá árunum 1940-1965 sem gefa einstaka innsýn í lífið í bænum á þessum árum. Viðfangsefnin eru af ýmsum toga en tengjast oftast fjölskrúðugu atferli manneskjunnar frá vöggu til grafar s.s.; skírn barns, stofnun lýðveldis, verkafólk við vinnu, skautahlaup, hernám á hlutlausu þjóðríki, fegurðarsamkeppni í Tívolí, afmæli, hárkollugerð o.s.frv. Vignir tók einnig fjölda mynda fyrir Reykjavíkurborg og eru margar þeirra mikilvægar heimildir um starfsemi sveitarfélagsins, sögu þess og þróun.